Fem spelarar på B-lista

Spelartroppen til A-laget er delt inn i to lister: Alle med proffkontrakt er ein del av spelarliste A og kan delta i alle kampar, så lenge dei ikkje er suspendert. Spelarliste B består av totalt fem spelarar, der minst éin skal vere keeper.

Spelarar på B-lista kan spele inntil tre kampar i OBOS-ligaen for A-laget, anten frå start eller som innbytar. Når ein spelar frå B-lista har delteke i tre kampar i same sesong, må han inngå profesjonell kontrakt og meldast inn på spelarliste A før han kan spele ein fjerde kamp.

Fem unggutar har derfor fått plass på B-lista.

Christian Hansen (Keeper)
Christian starta fjoråret på G16-laget, men vart etter kvart flytta permanent opp i rekruttroppen. Christian er ein hardtarbeidande, seriøs keeper som no også har blitt flytta opp i A-troppen.

Hans-Peter Tjervaag
Tjervåg sin eigen Trent Alexander-Arnold. HP er ein eksplosiv, offensiv vingback. I vårt system har han mange spissferdigheiter vi ser etter. HP har over lang tid tatt steg og er ein spelar for framtida.

Gudmund Andresen
Gudmund, som opphavleg er frå Voss, kom til oss frå Sogndal i fjor sommar. Gudmund er ein solid, hardtarbeidande midtstoppar med ei ruvande fysikk. Ein leiar-type som alltid går føre. Kaptein på Hødd 2. Debuterte på A-laget tidlegare i vinter.

Felix Mork
15 år gamle Felix har sidan oppstarten i januar trena fast med A-laget. Han har gjort sakene sine godt, fått jamlege innhopp og imponert oss alle.

Åsmund Roppen
Åsmund, som er ein fast del av A-laget, er ein profesjonell, hardtarbeidande spelar. Åsmund har mykje X-faktor i form av fysisk kapasitet og ein svært god venstrefot – noko vi kjem til å sjå meir av i tida som kjem.