Seriedebut for Hødd G15 nasjonal

Det er fyrste gong Hødd-akademiet har med eit nasjonalt lag, og i vår skal laget møte HamKam, Rosenborg, Aafk, Molde, Kristiansund i dobbel serie, altså 10 kampar.

Christer Johansen er trenar for laget. Han kom i vinter til Hødd frå Tromsø, der han trena damelaget. Han har også ansvar for G16-laget til Hødd. 25-åringen frå Trondheim spelte sjølv alderbestemt fotball i Rosenborg i fleire sesongar, og ser fram til å returnere til Salmar-banen.

- Ja, det vert kult. Det er lenge sidan eg har vore der, og eg har mange gode minner derifrå. Eg håper vi får ein god opplevelse, og er spent på korleis gutta responderer på denne utfordringa. Rosenborg er kanskje den største favoritten til å vinne serien, seier Christer.

Kva spelarar er det som utgjer Hødd G15 nasjonal?

- 9-10 av spelarane er frå Hødd, medan dei resterande spelarane er frå andre klubbar frå Søre Sunnmøre, Nordfjord samt eit par spelarar frå over fjorden. 

Kva er forventningane til årets sesong?

- Det vert nokre tøffe kampar, og vi kjem til å få ei bratt læringskurve. Samtidig trur eg vi er eit lag som kjem til å overraske. Vi har ein god lagmoral, kjem til å stå kampane godt, og så får vi sjå kva det held til, avsluttar trenaren.

Hødd G15 nasjonal vann 2-1 mot Sogndal på Høddvoll førre helg i siste treningskamp, og har tidlegare vunne 2-0 mot Aafk, 3-3 mot Molde og tapt 0-1 mot Kristiansund.

Laget reiser til Trondheim laurdag, og kampen søndag har avspark kl. 13.00 på Salmar-banen.